UIT DIE KANTOOR

“What if that One thing you're afraid of is the One thing you need, to get Your Big Breakthrough and Go to The Next Level?” ― Jeanette Coron
“Next level”: ons tema vir 2021, met ons leuse: “Excellence taken to the next level.”

 Dit bly elke oggend vir my ’n blye gesig om al ons leerders by die skool te sien. Dit is nie net goed vir hulle akademie nie, maar dit is wonderlik vir hul emosionele welstand. Ek wil daarom ’n beroep op u doen, om u kind skool toe te stuur indien hul gesond is en nie by die huis te hou sonder ‘n baie goeie rede nie. Moet asseblief nie nou die geleentheid aangryp om ’n langnaweek te neem nie, dis vir ons belangrik dat ons leerders terugkom in roetine. Indien u kind weens ’n geldige rede wel tuis moet bly, kontak asseblief die betrokke onderwysers vir die nodige reëlings.

Baie geluk aan ons graad7-monitors wat Maandagoggend ingehuldig is. Dit was vir my ’n voorreg om Maandag – al was dit onder vreemde omstandighede - hulle balkies aan hul te oorhandig en ek is verseker trots op die ywer waarmee hulle, hulle take en dienspunte uitvoer. Ons wens ons monitors ‘n geseënde en voorspoedige graad 7 jaar toe.

 

TOP AKADEMIESE PRESTEERDERS VAN 2020

Baie geluk aan die volgende leerders wat as toppresteerder in 2020 in die graad geeïndig het.
Graad 4 – Daniella Caetano
Graad 5 – Milka Nieuwenhuis
Graad 6 – Emma Steyn
Graad 7 – Renate Maré

 

MEDIA MONITORS

Baie geluk aan die volgende leerders wat as Media Monitors verkies is:

Daniël Reinecke 7A2 (Hoofmonitor)
Annette Lombard 6A1
Clara Bothma 6A3
Ziani Schoeman 6A2
Lara Kamfer 6A3
Ndalo Sitishi 6E2
Oarabile Maphoto 6E3
Farai Pandelani 6E2
Ethan Hendrikse 6E2
Keagan Lessing 5A1
Liesje Ingram 5A2
Lize Venter 5A3.

 

VERGETE ITEMS

Ons versoek asseblief dat ouers sal toesien dat leerders alles vir die dag pak, sodat dit nie nodig is vir leerders om ouers vir vergete benodigdhede bv. kos, sportsakke, take, ens. te skakel nie. Die toeloop in die kantoor en die aflewering van sulke items bemoeilik die volg van COVID-19-protokol. Help ons asseblief om u kind veilig te hou.

 

KWARTALE

Alhoewel die Departement van Basiese Onderwys ‘n gewysigde skoolkalender vir 2021 bekend gemaak het, bly die gepubliseerde kalender van Midstream College hoofsaaklik onveranderd. Die April- en Septemberskoolvakansie bly steeds dieselfde. Die tweede kwartaal sluit ‘n week later en die derde kwartaal begin gevolglik ‘n week later om die moontlike buitemuurseprogram en bepalings te akkommodeer.

 

JUNIOR KOOR

Alle seuns en dogters in graad 1 – 3 wat lief is daarvoor om te sing, kom sluit asseblief by die junior koor aan. Almal is welkom - daar sal geen oudisies wees nie. Junior kooroefening vind op Woensdae om 13:45 – 14:45 plaas. Voltooi asseblief die googlevorm indien u kind wil aansluit. Dit geld ook vir leerders wat verlede jaar deel van die junior koor was.

 

SENIOR KOOR-OUDISIES

Ons is verheug om u in kennis te stel dat ons toestemming verkry het vir ons senior koor om weer te begin oefen. Covid-19-protokol sal te alle tye nagekom word en ons wil ouers verseker dat geen kinders in gevaar gestel sal word nie. Let asseblief op die volgende:
• Oudisies sal in mev. Badenhorst se klaskamer op Woensdag 17 Februarie van 14:00 – 16:00 by mnr.
  Herman Steyn, ons koorafrigter, plaasvind.
• Graad 4 – 7 leerders wat graag by die senior koor wil aansluit moet hul name op die oudisielyste
  neerskryf. • Die lyste sal op mev. Badenhorst en mev. Deim se klaskamerdeure verskyn.
• Kinders moet ʼn tydgleuf kies vir hul oudisie en mag nie op enige ander tyd arriveer nie.
• Kinders wat oudisies bywoon hoef nie enige spesifieke liedjie te leer of te oefen nie.
• Maskers moet te alle tye gedra word en sosiale distansiëring sal gehandhaaf word.
• Hierdie oudisies is slegs vir kinders wat nie voorheen in die senior koor was nie. Bestaande koorlede 
  moet voor Vrydag 19 Februarie hul name op die lyste op mev. Badenhorst of mev. Deim se  
  klaskamerdeure skryf indien hulle in die 2021 senior koor ingesluit wil word.
• Kooroefeninge sal Woensdae van 16:30 – 18:30 in die skoolsaal plaasvind. Koorlede sal ʼn tydgleuf
  gedurende hierdie twee uur ontvang wanneer hulle kooroefening moet bywoon.

Ons moedig kinders aan om vir oudisies aan te meld en ons sien gretig daarna uit om weereens pragtige musiek te maak. Indien ouers enige vrae oor die senior koor het, is hulle welkom om mev. Deim of mev. Badenhorst te kontak by  mandyd@midstreamcollege.co.za of
mary-anneb@midstreamcollege.co.za.

 

LANDLOOP

Die landloopoefening begin hierdie jaar vroeg. Bring jou hardloopskoene en waterbottel saam na die oefeninge toe. Daar sal twee oefensessies per week vir elke graad wees. Almal wat belangstel is welkom. Ons ontmoet mekaar by die pawiljoen.

Graad 1 tot 4 is Maandae en Woensdae, 14:00 tot 15:00
Graad 5 tot 7 is Dinsdae en Donderdae, 14:00 tot 15:00

Vir enige navrae stuur ‘n e-pos aan mnr. Dirk Smith by dirks@midstreamcollege.co.za of mnr. Gerhard Sauer by gerhards@midstreamcollege.co.za

 

HEKKE

Hekke (hek 2 en 3 – by laerskool se parkeerarea) open om 07:00. Hande word by die hek ontsmet en temperatuurmeting word in graadverband gedoen. Die 2 hekke sluit weer om 07:45 en heropen weer om 13:15 en sluit om 14:30.

Hek 12 sal van 07:15 ‒ 07:45 oop wees en weer vanaf 13:15 tot 18:00.
Balmoralhek is van 13:00 tot 14:30 vir leerders oop.

Vir buitemuurse aktiwiteite kan leerders van hek 1, 4 en 12 gebruik maak.

 

BUITEMUURSE AKTIWITEITE

Druk asseblief op die onderstaande skakel vir die buitemuurse skedule vir die volgende twee weke.

 

STUDIEMETODES

Druk asseblief op die onderstaande skakel vir studiemetodes vir Afrikaanssprekende graad 5-tot 7-leerders.

 

VALENTYNSDAG

Ons wil graag hierdie jaar voortbou op die nuwe Valentynsdag-tradisie wat ons verlede jaar by die skool begin het.

As laerskool glo ons dat Valentynsdag ’n dag is wat op ons leerders se ouderdomsvlak gevier moet word. Ons kinders is nog nie emosioneel gereed om Valentynsdag te verstaan en ervaar vir wat dit regtig is nie. Ons wil graag ons kinders beskerm teen onnodige seerkry en die gevoel van verwerping. Ons wil hulle veel eerder van wáre omgee leer, byvoorbeeld om vir mense wat ondersteuning, aanvaarding en hulp nodig het, om te gee.

Dit skep immers ook ’n gevoel van vreugde en vervulling om ander te koester, te help en by te staan.
Ons gaan dus weer hierdie jaar iets spesiaal op Valentynsdag doen wat gefokus is op die idee dat liefde vir ons medemens nie net ’n opdrag van God is nie, maar heerlik en pret ook is! So, moet asseblief nié u geld op beertjies, plastiek rose, sjokolade en ander geskenke mors nie! Spaar eerder daardie geld vir wanneer u kind in die hoërskool is. Hierdie jaar bêre ons weer die pienk en rooi op Valentynsdag! Ons gaan die CHOC Foundation se “Flip Flop”-dag ondersteun met blou strikkies in die hare en gemaklike plakkies aan ons voete!

Kinders en tieners wat die stryd teen kanker voer is die dapperste van die dapperes. Hulle staan voor die skrikwekkendste reis van hul lewens … Maar hierdie jong krygers staan nie alleen in hulle oorlog teen kanker nie, want hulle ervaar liefde. Hulle is so geliefd dat CHOC ’n leër bou om saam met hulle te stap en al die pad saam met hulle te veg.

Ons gaan deel wees van hierdie ondersteuningsgroep en ons liefde op Valentynsdag aan kinders wat teen kanker veg, toon. Die CHOC Flip Flop Day-plakkers, wat jou 10 tone vrymaak van skoolskoene op 12 Februarie, sal teen R10 by die snoepie verkoop word. Die snoepie gaan ook weer hulle heerlike plakkie-koekies teen R16 elk verkoop.

Kom koop ’n plakker voor Valentynsdag Flip Flop-dag en geniet 12 Februarie op ’n gemaklike wyse wat almal die kans gee om op ’n heerlike manier ’n verskil te maak!

 

SNOEPIE: TUCK IN

Vir u gerief het Tuck In nou ook ’n aanlyn winkel waar u kosblikkies, slaaie, toebroodjies, lekkernye,  gekookte middagetes en kombo’s kan bestel.
Besoek gerus die aanlyn winkel en bestel vandag!