UIT DIE KANTOOR

Dit was vir my so wonderlik om die leerders Maandagoggend by die skool terug te verwelkom. Hulle was gereed vir hul skoolwerk, toegerus met die nodige handboeke en skryfbehoeftes. Die opgewonde lag en gesels was heerlik om te hoor. Dit is verder verblydend dat slegs enkele leerders nog nie by ons aangesluit het nie.

Ek versoek graag ons ouers om sosiale distansiëring toe te pas by die hek en nie die vloei van leerders wat die skool verlaat, te bemoeilik nie.

Geseënd is die man wat op die Here vertrou en wie se vertroue die Here is. Jeremia 17:7

 

EETGOED

Die skool besef dat om te verjaar ʼn hoogtepunt in elkeen se jaar is. Dit is nog meer so vir ons jong leerders, maar in die lig van die huidige situasie rakende die virus, en volgens regulasies, mag ons nie koek en pakkies toelaat nie. Ons vertrou dat u sal verstaan en waardeer u samewerking.

 

GRAAD 1 2022 AANSOEKE

Ouers word versoek om asseblief hulle graad 1-aansoeke vir 2022 voor 26 Maart 2021 in te dien.

Neem kennis dat die skool na ʼn aanlyn-aansoeksisteem oorgeskakel het. Geen aansoeke per e-pos of as harde kopie nie, asseblief.

Volg die skakel na Toelatings.
 
Kontak asseblief vir Corrie Burger (by corrieb@midstreamcollege.co.za of 012 940 9122) vir enige navrae.

 

INTERSENFASE EKSTRAKLASSE

Die skool bied gratis ekstra klasse aan vir graad 4- tot 7-leerders vir Engels, Afrikaans en Wiskunde. Hierdie klasse sal op Maandag 8 Februarie ‘n aanvang neem. Geen bespreking is nodig nie.

WISKUNDE
Graad 4: Maandae van 14:00 – 14:45 in Carna Kriel se klaskamer (69)
Graad 5: Maandae van 14:45 – 15:30 in Carna Kriel se klaskamer (69)
Graad 6: Woensdae van 14:00 – 14:45 in Joey von Abo se klaskamer (75)
Graad 7: Woensdae van 14:45 – 15:30 in Joey von Abo se klaskamer (75)

ENGELS
Graad 4 – 7: Maandae en Donderdae van 13:45 tot 14:30 in Marita Havenga se rekenaarklaskamer (F06)
 
AFRIKAANS
Graad 4 – 7: Dinsdae van 13:55 tot 14:30 in Marita Havenga se rekenaarklaskamer (F06)
Graad 4 – 7: Woensdae van 13:55 tot 14:30 in Me. C. de Villiers se klaskamer (LS06)

 

JUNIOR MUURBAL

Centurion Junior Squash spesialiseer in ʼn mini-muurbalprogram wat spesifiek ontwerp is om kinders tussen die ouderdomme van 6 en 10 jaar aan muurbal as sportsoort bloot te stel, asook om hulle op ʼn prettige en veilige wyse aan die vaardighede en konsepte van muurbalwedstryde bloot te stel.

Afrigtingsessies
CJS gebruik aangepaste toerusting, speletjies en reëls om te verseker dat alle spelers suksesvol kan deelneem. Elke sessie bestaan uit ʼn wye verskeidenheid aktiwiteite wat gerig is op die ontwikkeling van koördinasie (veral hand-oog-koördinasie), fundamentele en perseptuele motoriese vaardighede wat almal op die sentrale tema fokus ‒ PRET !!!! (Toerusting sal voorsien word.)

Gehaltewaarborg
Slegs geaffilieerde en opgeleide instrukteurs mag die program aanbied. Instrukteurs word gereeld op datum gebring om tred te hou met die nuutste vaardighede, speletjies en aktiwiteite en onderrig-/afrigtingstegnieke.

Voordele van Junior Squash
 ʼn Deel van elke sessie word aan muurbal-spesifieke vaardighede en aktiwiteite gewy. Nie net sal u kind ʼn goeie inleiding tot hierdie sportsoort ontvang nie, maar hulle sal ook vaardighede aanleer wat oorgedra kan word na ander sportsoorte wat hulle probeer. Vanweë die feit dat hierdie aktiwiteite hoofsaaklik groepsgerig is, behoort u kind selfvertroue te kry, terwyl hulle met kinders van dieselfde ouderdom in ʼn prettige en niebedreigende omgewing verkeer.

Waar word ʼn Junior Squash-klas aangebied?
Sessies word by Midstream College Primêr se muurbalbane langs die swembad aangebied. U is welkom om meer by cjsquash  te lees of besoek gerus ons Facebook-blad Centurion Junior Squash Group.

 ʼn Verpligte jaarlikse registrasiefooi van R200 per speler is betaalbaar met registrasie. Vandaar betaal die skool vir die afrigting. Druk asseblief op die onderstaande skakel vir registrasie.

Vir meer inligting, kontak: Maryna Fourie by 072 130 9381 of stuur ʼn e-pos na info@cjsquash.co.za.

 

SWEM

O.8 (Graad 2) Assesseringsessie
Indien u kind vryslag en rugslag met gemak, oor ʼn afstand van 25 m kan swem, is hy/sy welkom om die assesseringsessie op Dinsdag 16 Februarie om 13:30 – 14:00 by die skoolswembad by te woon.

Stuur asseblief voor/op Maandag 8 Februarie om 08:00 ʼn e-pos aan Carien Kruger indien u kind hierdie sessie wil bywoon. (carienk@midstreamcollege.co.za)

Ouers word ongelukkig nie op die skoolgronde toegelaat nie, as gevolg van COVID-regulasies.

O.9 – O.13 Swemproewe
Daar sal Maandag 15 Februarie swemproewe vir alle nuwe leerders en leerders wat nie in 2020 deel van die skool se swemspanne was nie, plaasvind. Swemmers moet vryslag, rugslag en borsslag met gemak, oor ʼn afstand van 50 m kan swem. Hierdie swemproewe sal vanaf 14:00 – 15:00 by die skoolswembad plaasvind.

Stuur asseblief voor/op Maandag 8 Februarie om 08:00 ʼn e-pos aan Carien Kruger by carienk@midstreamcollege.co.za indien u kind hierdie swemproewe wil bywoon.

Swemmers wat deel van 2020 se swemspanne was hoef nie aan dié proewe deel te neem nie en kan direk by die swemoefening inskakel. Die oefendae en -tye sal binnekort aan u gekommunikeer word.

Ouers word ongelukkig nie op die skoolgronde toegelaat nie, as gevolg van COVID-regulasies.

 

BUITEKURRIKULÊR

Ons wag nog in spanning om van die verskillende beheerliggame inligting oor die terugkeer van sport- en kultuuraktiwiteite te ontvang.

Met die opgewondenheid van die leerders terug by die skool en die afwagting om sport- en kultuuraktiwiteite te begin, het ons dit goed gedink om in die komende weke ʼn algemene vaardigheids- en kondisioneringsprogram met die leerders te doen.

Hierdie oefeninge sal nie sport-spesifieke oefeninge wees nie maar sal eerder fokus om die leerders se fiksheid, koördinasie, balans en algemene vaardighede te ontwikkel wat in lyn is met wat die leerders in Liggaamopvoedingsperiodes doen. Die oefeninge sal dan later oorgaan in meer sport-spesifieke vaardigheidsoefeninge.

Ons het dit ten doel om hierdie oefeninge ʼn aangename ervaring vir al ons leerders te maak en ons hoop dat almal hierdie inisiatief sal ondersteun.
Ons leerders het nodig om fisies aktief te wees, maar ook om op sosiale vlak interaksie met hulle medeleerders te hê.
Die indeling en oefentye sal in volgende week se nuusbrief verskyn.
Ons beplan dat die eerste oefeninge reeds op 15 Februarie sal begin.

Ons klubatlete, klubkrieket, tennisspelers en die muurbaaloefeninge gaan soos normaal voort.

Kultuuraktiwiteite:
Die Revuegroepe mag op hierdie stadium volgens regulasies glad nie oefen nie. Choral verse- en spreekkore sal eers in die tweede kwartaal begin oefen.

Die inligting rondom die Junior en Senior kooroudisies sal in volgende week se nuusbrief verskyn en daardie aktiwiteite sal ook op 15 Februarie begin. Ons wens ook die Grace Ensemble sterkte toe met hulle oefeninge, sowel as die redenaars wat begin.

Hou asseblief elke week die nuusbrief vir meer inligting dop.

“You can never cross the ocean until you have the courage to lose sight of the shore.” ‒ Christopher Columbus

 

BESTELLING VAN 2020 INDIVIDUELE FOTO’S

Indien u nog individuele foto’s van 2020 wil bestel, is die webwerf nou vir bestellings oop.
Gebruik die unieke kode op die fotovorm wat verlede jaar aan u gegee is.
Vir enige navrae kontak asseblief die fotograaf direk: Martie - 082 334 8847.

 

VALENTYNSDAG

Ons wil graag hierdie jaar voortbou op die nuwe Valentynsdag-tradisie wat ons verlede jaar by die skool begin het.

As laerskool glo ons dat Valentynsdag ’n dag is wat op ons leerders se ouderdomsvlak gevier moet word. Ons kinders is nog nie emosioneel gereed om Valentynsdag te verstaan en ervaar vir wat dit regtig is nie. Ons wil graag ons kinders beskerm teen onnodige seerkry en die gevoel van verwerping. Ons wil hulle veel eerder van wáre omgee leer, byvoorbeeld om vir mense wat ondersteuning, aanvaarding en hulp nodig het, om te gee.

Dit skep immers ook ’n gevoel van vreugde en vervulling om ander te koester, te help en by te staan.
Ons gaan dus weer hierdie jaar iets spesiaal op Valentynsdag doen wat gefokus is op die idee dat liefde vir ons medemens nie net ’n opdrag van God is nie, maar heerlik en pret ook is! So, moet asseblief nié u geld op beertjies, plastiek rose, sjokolade en ander geskenke mors nie! Spaar eerder daardie geld vir wanneer u kind in die hoërskool is. Hierdie jaar bêre ons weer die pienk en rooi op Valentynsdag! Ons gaan die CHOC Foundation se “Flip Flop”-dag ondersteun met blou strikkies in die hare en gemaklike plakkies aan ons voete!

Kinders en tieners wat die stryd teen kanker voer is die dapperste van die dapperes. Hulle staan voor die skrikwekkendste reis van hul lewens … Maar hierdie jong krygers staan nie alleen in hulle oorlog teen kanker nie, want hulle ervaar liefde. Hulle is so geliefd dat CHOC ’n leër bou om saam met hulle te stap en al die pad saam met hulle te veg.

Ons gaan deel wees van hierdie ondersteuningsgroep en ons liefde op Valentynsdag aan kinders wat teen kanker veg, toon. Die CHOC Flip Flop Day-plakkers, wat jou 10 tone vrymaak van skoolskoene op 12 Februarie, sal teen R10 by die snoepie verkoop word. Die snoepie gaan ook weer hulle heerlike plakkie-koekies teen R16 elk verkoop.

Kom koop ’n plakker voor Valentynsdag Flip Flop-dag en geniet 12 Februarie op ’n gemaklike wyse wat almal die kans gee om op ’n heerlike manier ’n verskil te maak!

 

SNOEPIE: TUCK IN

Vir u gerief het Tuck In nou ook ’n aanlyn winkel waar u kosblikkies, slaaie, toebroodjies, lekkernye,  gekookte middagetes en kombo’s kan bestel.
Besoek gerus die aanlyn winkel en bestel vandag!