UIT DIE KANTOOR

Met die terugkeer van al hoe meer sport- en kultuurgeleenthede, voel dinge op die skoolterrein amper weer soos voor die pandemie. Daar is ‘n nuwe energie in die lug en die kinders se entoesiasme is aansteeklik! Die kultuurgroepe oefen met hernude toewyding en ek is dankbaar vir elke geleentheid wat dié kinders aangryp. Ons het ook die afgelope Dinsdag ons eerste netbalwedstryde gehad. Dit het my hart verbly om die meisies se opgewondenheid en vreugde saam met hulle te ervaar. Ek sien uit na volgende week wanneer die rugbywedstryde ook weer begin.Die tennis neem natuurlik reeds aan verskeie toernooie deel en hou ons naam hoog van Gauteng tot in die Vrystaat. Op 8 en 9 Mei sal ons ruiterkunsspan weer hul staal tydens die tweede kwalifiseerder wys. Baie sterkte aan al ons seuns en dogters wat aan aktiwiteite deelneem. Geniet elke oomblik en gee jou beste.  Ons besef dat dit vir u as ouer moeilik is om nie die wedstryde by te woon nie, die direktiewe is egter baie duidelik ten opsigte daarvan dat geen toeskouers toegelaat word nie.

Ons wil graag al die graad 7-leerders gelukwens met hul toewyding en harde werk, binne en buite die klaskamer. Ons waardeer elke graad 7-leerder en stel elkeen hoog op prys. Die afgelope Maandag het ons ʼn groep kinders as leiers aangekondig wat meer pligte sal hê. Baie geluk aan hierdie kinders! Ek moedig al die graad 7’s aan om met hul spanwerk vol te hou en die toewyding wat hulle tot dusver getoon het, voort te sit.

Ek deel graag die volgende veelseggende gesegde met u: “I love that this morning’s sunrise does not define itself by last night’s sunset.” – Steve Maraboli

Ons wil net weer aan ouers ‘n vriendelike versoek rig dat indien u kind enige verkoue of griepsimptome ervaar hy of sy tuis moet bly totdat hulle gesond is. Indien u as ouer kontak gehad het met ‘n persoon wat positief getoets het vir COVID-19 en u vir ‘n COVID-19-toets gaan, moet u asseblief u kinders tuis hou totdat die uitslag bekend is.

 

SKOOLTYE

Skooltye is vanaf Maandag 10 Mei as volg:
• Graad 1- en 2-leerders van 07:45 tot 13:15
• Graad 3-leerders van 07:45 tot 13:30
• Graad 4- tot 7-leerders van 07:45 tot 13:40.

 

STUDIEMETODES

Druk asseblief op die onderstaande skakel vir ’n studiemetodekursus vir Afrikaanssprekende graad 5- tot 7-leerders.

 

SPREEKKOOR

Dit is tyd vir Spreekkoor 2021! Ons nooi alle leerders Graad 2 tot 4 om deel te wees van die spreekkoor. Oefening sal op Dinsdae 16:30 – 17:15 in die saal wees. Ons eerste oefening was op Dinsdag 4 Mei. As julle deel van die spreekkoor wil wees, stuur asseblief ‘n e-pos met u kind se naam, graad en klas na Mev. Karen Krynauw by karenk@midstreamcollege.co.za

 

ANOK

As jy belangstel om deel van ANOK te word moet jy die volgende doen:

1. Skryf ‘n kort skoolverwante artikel (Arial font, grootte12, 1.5 lynspasiëring)
2. Jou artikel moet ‘n kop (opskrif) hê en jou naam, van en graad onder die kop.
3. Neem ‘n foto wat by jou artikel pas / maak ‘n video wat jou artikel kan vergesel.
4. Die bostaande moet aan me. V. Piekaar gestuur word teen Maandag 31 Mei. (vickyp@midstreamcollege.co.za)
5. Jy is welkom om meer inligting by juffrou Piekaar te kry, indien jy oor iets onseker is.

 

CLOTHES TO GOOD… AND TREES

Ons is baie opgewonde oor hierdie kwartaal se uitreikprojek! Ons gaan saam met die hoërskool aan die internasionale Clothes to Good-aksie deelneem. Dit is skrikwekkend om te besef dat 85% van tekstiele elke jaar op rommelhope opeindig en dat 500 000 ton mikrovesels jaarliks in die oseaan ingestort word, wanneer ons ons klere was. Dit is tyd vir ons om te herwin! Hierdie projek sal vir jou ‘n goue geleentheid gee om seker te maak jou ou klere word herbruik.

HOE WERK DIT?
1. Elke kind sal Maandag ‘n groen plastieksak ontvang.
2. Vul dié sak met ou, SKOON klere, skoene of materiaal (bv. vadoeke, lappe).
3. Skenk jou sak hier by die skool.

Die klere sal gesorteer en op verskeie maniere herbruik word. Klere wat dienlik is om weer gedra te word, sal gebruik word om werksgeleenthede vir 108 mikrobesighede te skep. Klere wat nie meer gedra kan word nie, word kreatief gebruik om nuwe dinge te skep, soos drasakke, poppe en opvoedkundige speelgoed. Niks word weggegooi nie; elke laaste deeltjie word weer gebruik.

Clothes to Good gaan spekbome aan die skool skenk om dankie te sê en daarom sal die projek as die Clothes to Trees-projek bekend staan.

Kyk asseblief die video of besoek die webblad vir verdere inligting.

Die kinders sal hulle sakke Maandagoggend ontvang. Kom ons gebruik die naweek om bietjie daardie kaste uit te sorteer en dan stuur ons volgende week al die ou klere op nuwe avonture!

 

KOSSAK-PROJEK

RAAK BETROKKE!
Word deel van ons Kossak-projek en reik saam met Midstream College Primêre Skool uit na behoeftige gesinne.    #reikuit     #maklikomtehelp

Kyk asseblief na dieon oulike nuwe video.

 

SNOEPIE: TUCK IN

Besoek ons gerus by die skool of aanlyn vir gesonde middagetes en kosblikopsies, asook talle ander lekkernye. Ons voorsien graag in alle verjaardagpartytjie-behoeftes ook!