UIT DIE KANTOOR

“We shall never know all the good that a simple smile can do.” – Mother Teresa

Graag wil ek begin deur elke ouer te bedank vir die wyse wat u ons hande met die virtuele klasse versterk het.

Ons sien uit daarna om Maandag al ons leerders, maar in die besonder ons graad 1’s en nuwe leerders, persoonlik te ontmoet.

Alhoewel ons nou meer en meer na normaliteit beweeg met die leerders wat vanaf Maandag 1 Februarie elke dag skool mag bywoon, wil ek u verseker dat ons nog steeds die pandemie en die regulasies daarrondom baie ernstig opneem. Die dra van maskers, die fisiese distansiëring en die siftingsproses (“screening”) sal voortgaan. Elke leerder moet asseblief sorg dat hy elke dag 1 ekstra masker by die skool het.

Indien u kind egter geïsoleer moet word of enige simptome toon, moet u hom/haar asseblief tuis hou. In die interim sal ons met virtuele klasse vir hierdie leerders voortgaan.

 

VRAELYSTE WAT BEANTWOORD MOET WORD VOOR LEERDERS TERUGKEER SKOOLTOE

Ouers word versoek om asb. die vraelys vir die siftingsproses op die ouerpoort te voltooi, voordat leerders Maandag 1 Februarie by die skool aanmeld. Indien enige van hierdie inligting verander, moet ouers asseblief dadelik vir Suster Yvonne Malan (yvonnem@midstreamcollege.co.za) by die skool in kennis stel.

1. Volg die skakel na die ouerpoort, en teken in met u Parent ID en wagwoord.

2. Druk op die Student-tab en druk op die foto van u kind.

3. Beweeg na die COVID19-tab en voltooi die 4 vrae in die dropdown menu.
    “Submit” asseblief na elke antwoord.

 

GRONDSLAGFASE

Grondslagfase-leerders wat steeds van die aanlyn onderrigplatform gebruik gaan maak, sal die klasonderwyser se Zoom-uitnodiging skakel direk van die onderwyser ontvang. Hierdie skakel sal regdeur die dag gebruik word, aangesien alle klasse in die onderwyser se klaskamer sal plaasvind. Die leerder moet om 07:00 aanteken om by die klas aan te sluit. Aan die einde van die sessie moet elkeen net weer aanteken en met die klas voortgaan. Dieselfde skakel word deur die hele dag gebruik.

 ʼn Klasrooster wat LO-, Musiek- en Rekenaarlesse aandui, sal aan die ouers gestuur word. Tydens hierdie periodes sal die leerder nie vir die les hoef aan te teken nie. Hierdie tyd kan gebruik word om werk te voltooi, hersiening te doen of met huiswerk te begin.

Die klasonderwyser sal persoonlik met die ouers reël t.o.v. die afhaal of indiening van werk. Indien ʼn ouer egter nie in staat is om werk by die skool af te haal nie, sal die huiswerkkaart, sowel as alle werkkaarte wat vir die week benodig word, op die ouerpoort en leerderpoort beskikbaar wees.

 

INTERSENFASE

Alhoewel leerders terugkeer na die volledige skoolrooster wat al die vakke insluit, sal die “Virtual Classroom”-funksie nog steeds op die leerder- en ouerpoort beskikbaar wees. Dit is vir ingeval leerders weens geldige redes skool aanlyn moet bywoon.

Leerders wat aanlyn klasse bywoon sal die normale rooster volg. Dit sluit egter Liggaamlike Opvoeding uit, aangesien dit in die buitelug geskied. Let asseblief ook daarop dat die volgende onderwysers se klasse nie tydens skoolure sal geskied nie, maar wel in die namiddag aangebied sal word: Me. Lelanie Groenewald, Me. Janine Brummer en Mnr. Estian Esterhuizen. Hierdie namiddag-rooster met skakels sal op die leerderpoort onder ‘Dashboard’ beskikbaar wees.

Leerders wat die aanlyn skool bywoon, sal soos in die verlede weer die kwartaaltoetse, onder Zoom-toesig kan aflê. Maak asseblief seker dat die leerders toegang het tot Zoom, asook ‘n werkende kamera en ‘n mikrofoon . Ouers moet weekliks vir hierdie aanlyn toetsperiode aansoek doen.

 

NASKOOL

Die naskool sal op 1 Februarie hervat. Vir enige navrae kan u vir mev. Saarmari van der Vyver kontak (saarmariv@midstreamcollege.co.za).

Indien u van die naskooldiens gebruik wil maak, voltooi asseblief die onderstaande skakel voor Maandag
1 Februarie teen 09:00.

 

SLUITKASSIES

Sluitkassies is in 2021 vir alle graad 4- tot 7-leerders wat daarvoor aansoek doen, beskikbaar. Sodra al die sluitkassies aan die graad 4- tot 7-leerders toegeken is, sal graad 3-leerders ook die geleentheid kry om 'n sluitkassie te bekom. Die aansoek vir sluitkassies sluit op 5 Februarie. Sluitkassies sal op Maandag 8 Februarie aan die leerders toegeken word. Gebruik die volgende skakels om aansoek te doen vir ′n sluitkassie:

 

KWARTAALTOETSE

As gevolg daarvan dat ons die kwartaal met aanlyn leer moes begin en nie ons leerders van aangesig tot aangesig kon sien nie, het ons dit goedgedink om die eerste geskeduleerde kwartaaltoetse nie op 2 Februarie te laat plaasvind nie.

ENGELS
Die graad 4’s se toets sal deur ʼn onderrigles vervang word, wat op begripsvaardighede gebaseer is. Die leerders sal dan op ʼn latere stadium tydens ʼn Engels-periode ʼn begripsassessering voltooi.

Die graad 6’e se Engels kwartaaltoets sal deur ʼn oefenbegrip vervang word. Die leerders sal dan op ʼn latere stadium tydens ʼn Engels-periode ʼn begripsassessering voltooi.

AFRIKAANS
Beide graad 5- en 7-leerders sal tydens Dinsdag se toetsperiode ′n “oefentoets” skryf, wat ons dan in die Afrikaansperiode saam met die onderwyser sal merk, ter voorbereiding van die regte kwartaaltoets.

Die graad 5’s se toets sal tydens die klasperiodes op Donderdag 4 Februarie geskied.

Die graad 7’s sal hulle toets opVrydag 5 Februarie in klastyd skryf.

 

BUITE KURRIKULÊR

Die COVID-19-pandemie en gepaardgaande regulasies het reeds met die afskop van hierdie jaar ’n groot effek op sport - en ’n impak op ons buitemuurse program - gehad. Alle vriendskaplike atletiek- en swembyeenkomste is gekanselleer en ons wag nog om te hoor of ons Hillcrest galas hierdie jaar sal kan voortgaan. Sodra die besluit hieroor gefinaliseer is, sal ons u daaroor inlig.

Met die terugkeer van leerders op 1 Februarie wil ons graag so spoedig moontlik begin met die infasering van sportkodes en aktiwiteite wat binne daardie sportkodes se huidige regulasies toegelaat word.

Soos ons nuwe inligting van die beheerliggame ontvang oor watter sportkodes oopgestel word, sal ons dit aan u kommunikeer.

Die skool se liga-tennisspanne, klub-atlete, klubkrieket en die muurbalgroepe sal begin oefen. Streng protokol sal gevolg word en ons wil hierdie leerders aanmoedig om, soos die omstandighede dit toelaat, te begin oefen.

Ons swemmers moet ’n registrasieproses voltooi voor hulle met oefeninge kan begin en die inligting sal deur die organiseerders aan die swemmers gekommunikeer word. Sodra ons die proses voltooi het, sal ons die swemmers terug verwelkom.

Ons hoop dat ons teen 15 Februarie meer duidelikheid en sekerheid van die Departement van Onderwys sal verkry oor riglyne rondom die terugkeer van veral kultuuraktiwiteite.

Ons hoop en vertrou dat ons leerders by aktiwiteite sal inskakel soos dit oopgestel word.

 “We must accept finite disappointment, but we must never lose infinite hope.” – Martin Luther King

 

VALENTYNSDAG

Ons wil graag hierdie jaar voortbou op die nuwe Valentynsdag-tradisie wat ons verlede jaar by die skool begin het.

As laerskool glo ons dat Valentynsdag ’n dag is wat op ons leerders se ouderdomsvlak gevier moet word. Ons kinders is nog nie emosioneel gereed om Valentynsdag te verstaan en ervaar vir wat dit regtig is nie. Ons wil graag ons kinders beskerm teen onnodige seerkry en die gevoel van verwerping. Ons wil hulle veel eerder van wáre omgee leer, byvoorbeeld om vir mense wat ondersteuning, aanvaarding en hulp nodig het, om te gee.

Dit skep immers ook ’n gevoel van vreugde en vervulling om ander te koester, te help en by te staan.
Ons gaan dus weer hierdie jaar iets spesiaal op Valentynsdag doen wat gefokus is op die idee dat liefde vir ons medemens nie net ’n opdrag van God is nie, maar heerlik en pret ook is! So, moet asseblief nié u geld op beertjies, plastiek rose, sjokolade en ander geskenke mors nie! Spaar eerder daardie geld vir wanneer u kind in die hoërskool is. Hierdie jaar bêre ons weer die pienk en rooi op Valentynsdag! Ons gaan die CHOC Foundation se “Flip Flop”-dag ondersteun met blou strikkies in die hare en gemaklike plakkies aan ons voete!

Kinders en tieners wat die stryd teen kanker voer is die dapperste van die dapperes. Hulle staan voor die skrikwekkendste reis van hul lewens … Maar hierdie jong krygers staan nie alleen in hulle oorlog teen kanker nie, want hulle ervaar liefde. Hulle is so geliefd dat CHOC ’n leër bou om saam met hulle te stap en al die pad saam met hulle te veg.

Ons gaan deel wees van hierdie ondersteuningsgroep en ons liefde op Valentynsdag aan kinders wat teen kanker veg, toon. Die CHOC Flip Flop Day-plakkers, wat jou 10 tone vrymaak van skoolskoene op 12 Februarie, sal teen R10 by die snoepie verkoop word. Die snoepie gaan ook weer hulle heerlike plakkie-koekies teen R16 elk verkoop.

Kom koop ’n plakker voor Valentynsdag Flip Flop-dag en geniet 12 Februarie op ’n gemaklike wyse wat almal die kans gee om op ’n heerlike manier ’n verskil te maak!

 

SNOEPIE: TUCK IN

Vir u gerief het Tuck In nou ook ’n aanlyn winkel waar u kosblikkies, slaaie, toebroodjies, lekkernye, eetgoed vir klaspartytjies, gekookte middagetes en kombo’s kan bestel.
Besoek gerus die aanlyn winkel en bestel vandag!

 

GHOLF 2021

Leerders wat op ’n sinvolle wyse nege gaatjies op hul eie kan speel, is welkom om op Dinsdae by ons gholfspelers in te val. Spelers gaan op dié dae nege gaatjies onder toesig speel. Die reëling sal vanaf 9 Februarie tot 16 Maart 2021 geld. Spelers moet stiptelik om 14:00 by die gholfbaan aanmeld. Om by die COVID-19-regulasies te hou, moet ons weet hoeveel spelers van die geleentheid gebruik sal maak. Stuur asseblief vir mnr. Kotze ’n e-pos met u kind se naam, van en graad, indien u kind belangstel.

DIE SESSIES IS NIE VIR AFRIGTING NIE, maar om spelers wat reeds kan speel, die geleentheid te bied om te speel.

Vir verdere inligting kontak mnr. Kotze by (012) 661–0724 of e-pos u navrae na: schalkk@midstreamcollege.co.za. (Kostes: R50-00 per speler per middag).

Indien daar leerders is wat graag met gholf wil begin, of wat baie sukkel, kan hulle by die gholf-baan navraag doen met die oog op moontlike afrigting.

Kontakbesonderhede: Patrick O’Brien: 082 992 1314 of per e-pos patrick@pobgolf.co.za
                                           Christo Eagleton: 082 536 3354.

 

TINA COWLEY

Die program fokus op leesvaardighede soos begripslees en spoedverbetering om leerders te help met studeer, leer en die beantwoording van vraestelle wat vir die res van ʼn mens se lewe nodig is.  Vir meer inligting druk op die onderstaande skakel.