UIT DIE KANTOOR

Dit is met ’n trotse hart dat ons, ons atlete met hul uitsonderlike prestasies Saterdag tydens die Top 10 Atletiekbyeenkoms gelukwens. Ons’n algemene 2de plek uit 28 skole verower. Janelle Kirkpatrick en Kwena Mojapelo is ook aangewys as die beste baanatlete vir die senior meisies en seuns onderskeidelik. Baie geluk aan elke atleet, afrigter en ondersteuner!

Baie geluk aan ons Midstream College Monitors vir 2023. Dinsdagaand het ons aan ons potensiële leiers erkenning gegee en hulle het nou die geleentheid om hul leierskap te ontsluit, inisiatief te neem en formeel hul groei as graad 7-leiers by Midstream College te begin. Dinsdagaand het ek die volgende aanhaling van Maya Angelou met ons monitors gedeel: “I learned that people will forget what you said, people will forget what you did, but people will never forget how you made them feel.”

 

YADAH

Hierdie week bid ons vir… die graadsewes van ons skool. Ons bid vir Godgegewe vriendskappe wat opbouend is, vir selfvertroue en dat hulle sal besef dat God elkeen uniek en wonderlik gemaak het, ons bid vir dapperheid om op te staan vir hulself en vir ander, ons bid vir sukses en groei in alles wat hulle aanpak en dat hulle werklik ’n geseënde en gelukkige laaste jaar in die laerskool sal hê.

 

CHOC: “FLIP FLOP”-DAG

Ons wil graag hierdie jaar voortbou op die Valentynsdag-tradisie wat ons by die skool begin het. As laerskool glo ons dat Valentynsdag ’n dag is wat op ons leerders se ouderdomsvlak gevier moet word. Ons kinders is nog nie emosioneel gereed om Valentynsdag te verstaan en ervaar vir wat dit regtig is nie. Ons wil graag ons kinders beskerm teen onnodige seerkry en die gevoel van verwerping. Ons wil hulle veel eerder van wáre omgee leer, byvoorbeeld om vir mense wat ondersteuning, aanvaarding en hulp nodig het, om te gee.

Dit skep immers ook ’n gevoel van vreugde en vervulling om ander te koester, te help en by te staan.

Ons gaan dus weer hierdie jaar iets spesiaals doen wat gefokus is op die idee dat liefde vir ons medemens nie net ’n opdrag van God is nie, maar heerlik en pret ook is!

So, moet asseblief nié u geld op beertjies, plastiekrose, sjokolade en ander geskenke bestee nie! Spaar eerder daardie geld vir wanneer u kind in die hoërskool is. Ons gaan die CHOC Foundation se “Flip Flop”-dag ondersteun met blou strikkies in die hare en gemaklike plakkies aan ons voete!

Kinders en tieners wat die stryd teen kanker voer is die dapperste van die dapperes. Hulle staan voor die skrikwekkendste reis van hul lewens … Maar hierdie jong krygers staan nie alleen in hulle oorlog teen kanker nie, want hulle ervaar liefde. Hulle is so geliefd dat CHOC ’n leër bou om saam met hulle te stap en al die pad saam met hulle te veg.

Ons gaan deel wees van hierdie ondersteuningsgroep en ons liefde aan kinders wat teen kanker veg, toon. Die CHOC Flip Flop Dag-plakkers, wat jou 10 tone vrymaak van skoolskoene op Vrydag 17 Februarie, sal teen R10 by Tuck In verkoop word. Koop ook weereens jou oulike plakkie-koekie. Verkope is slegs vir die week van 13 ‒ 17 Februarie. Betalings moet asseblief kontant geskied.

Kom koop ’n plakker voor Flip Flop-dag en geniet 17 Februarie op ’n gemaklike wyse wat almal die kans gee om op ’n heerlike manier ’n verskil te maak!

LET WEL: Geen sokkies, CROCS, ens. nie. Slegs plakkies, sonder sokkies en gewone skooldrag sal toegelaat word.

 

AFRIKAANS EKSTRA LESSE

Verwys asseblief na die skoolkalender vir die begin- en einddatums van elke kwartaal se Afrikaans ekstra lesse.
Lesse geskied van 13:50 ‒ 14:30.

Graad 6 en 7 Huistaal: Maandae (Lokaal: Me. C. de Villiers)
Graad 6 en 7 Eerste Addisionele Taal: Dinsdae (Lokaal: Me. C. Kruger)
Graad 4 en 5 Huistaal: Woensdae (Lokaal: Me. E. van der Merwe)
Graad 4 en 5 Eerste Addisionele Taal Woensdag (Lokaal: Me. V. Piekaar).

Hierdie lesse is gemik op leerders vir wie ekstra vaslegging nodig is.

 

SPREEKKOOR

Dit is tyd vir Spreekkoor 2023!
Ons nooi alle graad 2-, 3- en 4-leerders om deel van die spreekkoor te wees. Oefening sal op Donderdae 07:10 in die saal wees. Ons begin eers in die 2de kwartaal met oefening. As julle deel van die spreekkoor wil wees, stuur asb. ’n e-pos met u kind se naam, graad en klas na die onderstaande e-posadres..

 karenk@midstreamcollege.co.za

 

VOORTREKKERS

Vir meer inligting druk asseblief op die onderstaande skakel.

 

KOSSAK-PROJEK
MIDSTREAM GEE OM – RAAK BETROKKE!

Midstream College Primêre Skool reik jaarliks uit na gesinne in nood, deur basiese nie-bederfbare voedsel en ander huishoudelike items te voorsien.

Tesame met KSM wil ons optimaal en effektief voedsel na gesinne in nood versprei. Kossakke word maandeliks deur Midstream-gesinne gevul en by die skool afgelewer, waarna dit aan KSM oorhandig word vir verspreiding. Alternatiewelik kan u as gesin kies om sakke deur die loop van die jaar te borg, deur maandeliks die bedrag vir ’n sak direk in die kerk se rekening in te betaal.

Die inhoud van die sakke, wat ongeveer R350 beloop, voorsien ‘n gesin van vier mense vir twee weke van die noodsaaklikste voeding.

Dit is ’n maklike manier om by liefdadigheid betrokke te raak en u kinders deel te maak van ’n omgee-projek.

Indien u belangstel, registreer asseblief deur die skakel hieronder te volg.  Meer inligting sal dan aan u gestuur word.